Tá suíomh idirlín an iarrthóir uachtaránachta i Meiriceá Donald Trump ag taispeáint íomhá den fhuil ar a éadan tar éis an ionsaí gunna Dé Sathairn agus ag impí ar a lucht leanúna airgead a sheoladh chuig an bhfeachtas.
Táthar ag impí ar dhaoine freisin seasamh le chéile "le spiorad an mhuintearais agus na síochána".
Tá nasc ó shuíomh Trump chuig leathanach ar an ardán bailithe airgid WinRed ina bhfuil íomhá a tharraing AP den iarrthóir, fuil ar a éadan agus a dhorn crochta san aer aige, agus an mana "FEAR NOT" air.
Faoi sin tá na focla "Unity. Peace. Make America Great Again" agus roghanna éagsúla inar féidir síneadh láimhe a thabhairt don fheachtas.
"Deir go leor daoine" a dúirt Trump leis an New York Post "nár facthas íomhá chomh haitheanta leis riamh cheana.
"Is fíor dóibh, agus níor cailleadh mé! Is iondúil go mbíonn ort bás a fháil le pictiúr íocónach den tsaghas sin a bheith agat."
Idir an dá linn tá rabharta earraí bolscaireachta seolta ar an idirlíon bunaithe ar íomhánna den iarracht ar mharú.
Tá t-léinte á ndíol ar phraghasanna ó €8 go €36 agus na manaí 'Bulletproof', ‘Legends Never Die’, ‘Grazed but not Dazed, ‘Shooting Makes Me Stronger’ greannta orthu.
